shab-e-visal mein dil par qalaq abhi se hai
sahar hai dur mera rang faq abhi se hai

hunuz dafn hua hi nahin tera bismil
ki zalzale mein zamin ka tabaq abhi se hai

main likh chuka hi nahin haal-e-dil ki us ki taraf
hawa-e-shauq mein udta waraq abhi se hai

chala nahin wo irada hi sair-e-mah ka hai
pa nazuki se jabin par araq abhi se hai

kisi ne sham ke aane ko kya kaha 'ishrat'
ki munh pe aap ke phuli shafaq abhi se hai