shab ke pur-haul manazir se bacha le mujh ko
main teri nind hun aankhon mein chhupa le mujh ko

main teri rah-e-mashiat ka hun zarra lekin
dhundhne wala sitaron mein khangale mujh ko

khauf aankhon mein meri dekh ke chingari ka
kar diya raat ne suraj ke hawale mujh ko

main musawwir hun bure waqt ki taswiron ka
ras aate hain ye diwar ke jale mujh ko

umr bhar jis ke liye pet se bandhe patthar
ab wo gin gin ke khilata hai niwale mujh ko

bediyan dal ke parchhain ki pairon mein mere
qaid rakhte hain andheron mein ujale mujh ko

tere hathon ka tarasha hua patthar hun 'salim'
aaina ho gae sab dekhne wale mujh ko