shab teri charaghon si jalti rahi
raat bhar shama si main pighalti rahi

dil mein tufan jazbaat ka yun utha
mauj sagar mein jaise machalti rahi

wasl kei aarzu yun badan mein chubhi
sej par karwaten main badalti rahi

aankhon se nind k sab parinde ude
main idhar se udhar hi tahalti rahi

bah rahi pyar kei ek mujh mein nadi
pyar kei aag mein phir bhi jalti rahi

rahguzar mein lagi hai bahut thokaren
main giri aur gir kar sambhalti rahi

bas tasawwur kiya tha 'anis' aap ka
samne dekh kar aankh malti rahi