shafaq sitare dhanak kahkashan banate hue
wo is zamin pe mila aasman banate hue

bhatak na jaen mere baad aane wale log
main chal raha hun zamin par nishan banate hue

chalo ab un ki bhi basti mein phul bant aaen
jo thak chuke hain ye tir-o-kaman banate hue

mere wajud ki ruswaiyan tumhaari qasam
hai dil mein khauf phir ek raaz-dan banate hue

jalae hath tahaffuz mein warna aandhi se
charagh bujh gaya hota dhuan banate hue

pada hua hai wo tarikiyon ke malbe mein
khayal-o-khwab mein ek kahkashan banate hue

yahi ho ajr mere kar-e-khair ka shayad
akele rah gaya khud karwan banate hue

zamin pe baith gaya thak ke do-ghadi 'khalid'
amir logon ki wo kursiyan banate hain