shahr-dar-shahr dida-war bhatke
zoam-e-baatil mein tajwar bhatke

khud-sari mein jo mo'atabar bhatke
ham-safar un ke be-khabar bhatke

fan ki pagdandiyon pe chalte hue
kabhi bhatke to be-hunar bhatke

hum jo bhatke to na-shanasa the
rahbar kyun idhar udhar bhatke

ek aalam ko jis ne bhatkaya
kabhi yun ho ki wo nazar bhatke

apni manzil ka ilm hote hue
phir bhi hum jaan-bujh kar bhatke

zindagi ke libas-e-khasta mein
dhup mein hum barahna-sar bhatke

kis mein himmat thi hum ko bhatkata
apni khwahish pe umr-bhar bhatke

hae us gul-badan ki hasrat mein
yun bhatakna na tha magar bhatke

us ko bhi pa sake nahin 'farhat'
jis ki khwahish mein dar-ba-dar bhatke