shahr mein tha na tere husn ka ye shor kabhu
misr is jins se itna na tha mamur kabhu

ishq mein dad na chaho ki suna hum ne nahin
adl o insaf ka is mulk mein dastur kabhu

fikr marham ka mere waste mat kar naseh
khub hota nahin is ishq ka nasur kabhu

go na kar wada wafa de na mujhe us ka jawab
mujh se milna bhi sajan hai tujhe manzur kabhu

apni bedardi ki saugand hai tujh ko ai marg
tu ne dekha hai 'yaqin' sa koi ranjur kabhu