shairi hasil-e-diwangi-e-dil to nahin
narm halqe teri zulfon ke salasil to nahin

qaus-e-abru kham-e-gesu shikan-e-peshani
aaj bhi ishq ke pechida masail to nahin

ek jhalak dur se dikhla ke wo chhup jate hain
sang-e-mil aae hain kuchh rah mein manzil to nahin

tez-rau chand ghataon mein tah-o-baala hai
muztarib koi safina pae sahil to nahin

tishnagi mein nazar aate hain sarab-e-sahra
har nazar par ye guman hai koi mail to nahin

fasle tai na hue ra-nawardi ke baghair
gamzan jaanib-e-rahraw koi manzil to nahin

kyun na ghafil ho faraez se zamana 'mani'
kam yahan waqt guzari ke mashaghil to nahin