shakh-e-jazbaat pe naghmat ka manzar khamosh
gham ki aaghosh mein arman ka kabutar khamosh

nind roti rahi sunsan khandar mein chhup kar
qasr-e-shahi ka hasin makhmalin bistar khamosh

surkh aandhi chali is bar halakat ki ajab
gharq amwaj huin aur samundar khamosh

sikka baitha tha us insan ki wafa ka aisa
shirk behosh tha aur zulm ka lashkar khamosh

filen dard ki bikhri thin bhare chehre mein
aur aankhon mein meri ashk ka daftar khamosh

bahte jate hain yahan chaaron taraf laf-o-gazaf
fan ke maidan mein pakiza sukhnawar khamosh

'qudsi' bazicha-e-atfal thin aahen meri
aur tha dahr tamashai muqaddar khamosh