sham-e-gham bimar ke dil par wo ban aai ki bas
har taraf tarikiyan aur aisi tanhai ki bas

dil ki barbaadi ka afsana abhi chheda hi tha
anjuman mein har taraf se ek sada aai ki bas

un ki aankhon mein jo ashk aae to yun aae ki uf
un ke honton par hansi aai to yun aai ki bas

umr-bhar ke waste chup ho gaya bimar-e-gham
aap ne ki bhi to ki aisi masihai ki bas

kya kahen 'rahi' ki apnon se hamein kya kya mila
wo nawazish wo karam wo izzat-afzai ki bas