sham ke waqt charaghon si jalai hui main
ghup andheron ki munderon pe sajai hui main

dekhne walon ki nazron ko lagun sada waraq
teri tahrir mein hun aise chhupai hui main

khak kar ke mujhe sahra mein udane wale
dekh raqsan hun sar-e-dasht udai hui main

kya andheron ki hifazat ke liye rakkhi hun
apni dahliz pe khud aap jalai hui main

log afsana samajh kar mujhe sunte hi rahe
dar-haqiqat hun haqiqat se banai hui main

meri aankhon mein samaya hua koi chehra
aur us chehre ki aankhon mein samai hui main

kitni hairan hai duniya ki muqaddar ki nahin
apni tadbir ke hathon hun banai hui main

mere andaz pe ta-der 'alina' wo hansa
zikr mein us ke thi yun khud ko bhulai hui main