sham ko subh ki aur subh ko hai sham ki baat
kaise nadan hain wo karte hi nahin kaam ki baat

jab kiya karte hain hum saqi-e-gulfam ki baat
lab pe aa jati hai aksar dil-e-nakaam ki baat

dhalte suraj ko dikhaya to kabhi gul ki hayat
hum se is tarah se ki husn ke anjam ki baat

nafrat-o-bughz-o-tassub ke alawa tum se
aaj tak ho na saki koi kabhi kaam ki baat

jalte shahron ka dhuan aankhon mein ghuma aksar
yaad aai hai jo guzre hue ayyam ki baat

jo bahaaron ki latafat ko samajhte hi na hon
un se sayyaad kare kyon qafas-o-dam ki baat

hai zarurat ki mohabbat ka sabaq den sab ko
aao hum mil ke karen azmat-e-islam ki baat

kaun sa jurm hai farmaen zamane wale
tishna-lab karte hain saqi se agar jam ki baat

ranj rahat se badalte to maza aa jata
mahfil-e-aish mein hoti gham-o-alam ki baat

khub dozakh se daraata hai gunahgaron ko
lab pe waiz ke nahin hai karam-e-am ki baat

be-dhadak 'josh' wo badhte rahe manzil ki taraf
qafile walon ne sochi nahin anjam ki baat