sharab-o-shisha-o-saghar subu-o-paimana
fida-e-nim-nigahi tamam mai-khana

qadam qadam pe mashiyyat ne panw chume hain
ye kis maqam se guzra hai tera diwana

kabhi kabhi to haram kya hai but-kada kya hai
main tere dar se bhi guzra hun be-niyazana

usi ke dam se hai raushan harim-e-kaba-e-dil
khuda kare ki na gul ho charagh-e-but-khana

jamal-e-yar jhalakta hai 'arzu' jis mein
meri ghazal hai wo rangin aaina-khana