shauq-e-didar mera aur bhi afza na karen
mehrban samne aaen zara parda na karen

wo to kuchh ho hi gai tum se mohabbat warna
hum wo khud-sar hain ki apni bhi tamanna na karen

phir na ho jaen kahin dil mein tamannaen jawan
ghaur se itna hamein aap to dekha na karen

aap ke tarz-e-inayat se samajh jaenge
barsar-e-bazm hamein aap yun ruswa na karen

hurmat-e-ishq salamat rahe dekhen apne
jazba-e-dil ka kisi haal mein sauda na karen

hum bhi bah jaen na jazbaat ke dhaare mein kahin
husn ko apne kisi taur huwaida na karen

tut bhi sakte hain 'zaryab' ye nazuk rishte
samne us ke kabhi shikwa-e-beja na karen