shauq ki nigahon ka aaj imtihan kar len
be-niyaz nazron ko dil ka raazdan kar len

jis ke waste barson sai-e-raegan ki hai
ab use bhulane ki sai-e-raegan kar len

raazdari-e-ulfat ta-ba-kai kare koi
sargiran hai wo yun bhi aur sargiran kar len

aap ke liye koi din-o-dil luta baitha
ek nigah-e-khandan ka aap bhi ziyan kar len

aap se use nisbat aap se ta'alluq kya
aaiye zara hum bhi zikr-e-asman kar len

ek musht-e-khas par ye nur-e-husn ki barish
phir kisi tarah tamir apna aashiyan kar len

jis qadar mile kam hai dard-e-ishq ki daulat
har hikayat-e-gham ko apni dastan kar len

khush-gumaniyan un ki wajh-e-be-niyazi hain
rukhsat ai wafa-keshi kuchh to bad-gumaniyan kar len

hairat-e-nazara hai pasban-e-chashm-o-dil
aap har karishma ko sarf-e-imtihan kar len