mujhe aamajgah-e-nawak-e-bedad rahne de
jo is ka nam barbaadi hai to barbaad rahne de

sarisht-e-ishq lazzat-ashna-e-talkh-kaami hai
main nashad-e-tamanna hun mujhe nashad rahne de

nahin jab subha-o-zunnar ke phande mein girai
mujhe dair-o-haram ke dam se aazad rahne de

abhi se kyon bani jati hai chashm-e-naz begana
fareb-e-arzu kuchh din sitam-ijad rahne de

kiya hai kin umidon par faraham aashiyan main ne
khudara mausam-e-gul tak mere sayyaad rahne de

hamein aazadi-e-fikr-o-nazar ka iddaa to hai
koi ghaarat-gar-e-iman agar aazad rahne de

dil-e-barbaad se ye chashmak-e-chashm-e-tarab kyon hai
karam-na-ashna ko khugar-e-bedad rahne de