shayad kisi ne aap se ye kah diya ghalat
mumkin hai aap hi ne kahin sun liya ghalat

wallah ab bhi aap ka main jaan-nisar hun
main aur aap hi se kahunga bhala ghalat

muddat ke baad aaj nazar aae shukr hai
dekha ye jab se tum ko mera gham hua ghalat

hum ko nahin hai wasta kuchh ishq se wale
charcha kisi ne kar diya hai ja-ba-ja ghalat

jate the ghar raqib ke par aa gae yahan
un ko bata diya hai kisi ne pata ghalat

hum ne suna ki hazrat-e-'kaamil' guzar gae
hai aarzu ki nikle khabar ya-khuda ghalat