shiddat-e-dard-e-jigar ho ye zaruri to nahin
aur phir aankh bhi tar ho ye zaruri to nahin

be-khudi bais-e-kulfat bhi to ho sakti hai
har nafas kaif-asar ho ye zaruri to nahin

khud ko pamal hi karna hai to ai josh-e-junun
wo teri rah-guzar ho ye zaruri to nahin

nashsha-e-khwab chura lae teri aankhon se
nala-e-shab mein asar ho ye zaruri to nahin

nazar aata hai jidhar silsila-e-naqsh-e-qadam
meri manzil bhi udhar ho ye zaruri to nahin