shiddat-e-shauq asar-khez hai jadu ki tarah
dil ki dhadkan ki bhi aawaz hai ghunghru ki tarah

main wo diwana-e-haalat hun sahra sahra
jo phira karta hai bhatke hue aahu ki tarah

jaane kis rang mein aai hai bahaaran ab ke
phul bhi zakhm sa shabnam bhi hai aansu ki tarah

wo jo amwaj-e-hawadis mein hain palne wale
un ko tufan nazar aata hai lab-e-ju ki tarah

gum-rah-e-shauq ko hamrah dikhane ke liye
zulmat-e-shab mein chamakte rahe jugnu ki tarah

fikr-o-fan ki nae gul-daste saja kar 'wahid'
aao bas jaen har ek zehn mein khushbu ki tarah