shikast-e-zarf se khoen na hum bharam apna
sharab pi ke na bahke kabhi qadam apna

ye jaante hain ki mearaj-e-zindagi kya hai
wafa ki rah mein karte hain sar qalam apna

hum apne dil ko maqam-e-khuda samajhte hain
yahi hai der ab apna yahi haram apna

ye bal jabin-e-qaza-o-qadar pe kyun aakhir
bana rahe hain muqaddar jo aaj hum apna

bahut khulus 'munawar' ke dil mein pata hun
ajib shakhs hai ye dost mohtaram apna