shikwa-e-bedad se mujh ko to darna chahiye
dil mein lekin aap ko insaf karna chahiye

ho nahin sakta kabhi hamwar duniya ka nasheb
is gadhe ko apni hi mitti se bharna chahiye

jam' saman-e-khud-arai hai lekin ai 'aziz
jis ki surat khub ho us ko sanwarna chahiye

'ashiqi mein khanda-rui salikon ko hai muhaal
hai yahi manzil ki chehre ko utarna chahiye

har 'amal tera hai 'akbar' tabe’-e-‘azm-e-harif
jab ye mauqa' ho to bhai kuchh na karna chahiye