shishe ke badan walo patthar se na takrao
diwane ki aamad hai is rah se hat jao

ilzam koi tum ko qatil ka na de baithe
daman ko bacha kar tum maqtal se guzar jao

tafriq ka insan ki hal koi nikal aae
tajwiz koi aisi yaro hamein batlao

us ne mere shanon pe zulfon ko bikhera hai
ta'bir koi mujh ko is khwab ki batlao

phir ras na aaegi tanhai tumhein shayad
'jawed' bulandi se dharti pe utar aao