shor sahil se machana aur hai
dub jaane se bachana aur hai

gham mein khud aansu bahana aur hai
hans ke duniya ko rulana aur hai

nawak-afgan tair-e-bismil hai dil
us ka andaz-e-nishana aur hai

kya karun sayyaad tujh ko bagh bagh
ab qafas mein hun tarana aur hai

sakht dil ko de jo narmi se shikast
us ki shan-e-fatehana aur hai

dil ke lutne ki khabar kya khak ho
us ki shokhi shatirana aur hai

dil mein chhuriyan lab pe baaten narm narm
kis qadar rang-e-zamana aur hai

wo kisi ki baat kyon sunne lage
aaj-kal un ka zamana aur hai

aur bhi to aashiyan hain bijliyo
kya mera hi aashiyana aur hai

dil mein hai 'wasif' wala-e-ahliyat
hum faqiron ka khazana aur hai