shuhud-e-dil-zadgan manzaron mein rakh aana
lahu ke dagh gulon ke paron mein rakh aana

ye khanwada-e-mansur mit na jae kahin
meri mata-e-junun kuchh saron mein rakh aana

hain in mein band kisi ahd-e-rast-khez ke aks
ye meri aankhen ajaib-gharon mein rakh aana

ye raat pichhle pahar aaftab dhundegi
charagh-e-sham jala kar darun mein rakh aana

tamam umr ek aandhi mein par rakhe 'salim'
wida ho to ek aandhi paron mein rakh aana