shukriya bich safar aap ne tanha chhoda
is tarah aap ne mujh se mera rishta joda

shiddat-e-taish se kanp utthi hain sari shakhen
jab bhi gulchin ne kisi shakh se gul ko toda

apne andar se wo ek dam na nikalega mujhe
mujh ko aankhon se wo tapkaega thoda thoda

hum ne tahzib se maikhane ka badla hai nizam
hum ne mai phenki na maikhane mein saghar toda

donon khush hain to ab is baat ka kya zikr karen
kis ne rukh apna dar-e-yar se pahle moda