shukriya tera ki gham ka hausla rahne diya
be-asar kar di dua dast-e-dua rahne diya

munsifi ka shor-e-mahshar gunjta rahne diya
sab dalilon ko suna aur faisla rahne diya

ai khuda mamnun hun tera ki mere phul mein
tu ne khushbu-e-hawas rang-e-wafa rahne diya

kuchh ishaare itne mubham itne wazeh itne shokh
dastan sari suna di muddaa rahne diya

ek naz-e-be-takalluf mere tere darmiyan
duriyan sari mita din fasla rahne diya