shuur-e-zist sahi e'tibar karna bhi
ajab tamasha hai lail-o-nahaar karna bhi

hadis-e-gham ki tawalat giran sahi lekin
kisi ke bas mein nahin ikhtisar karna bhi

bana ke kaghzi gul log ye samajhte hain
ki ek hunar hai khizan ko bahaar karna bhi

ab is nazar se teri rah dekhta hun main
tera karam hai tera intizar karna bhi

guzarne ko to hum ne baras guzar diye
bada azab hai ghadiyan shumar karna bhi

khulus-o-mehr ki kohna riwayaton pe na ja
qadim rasm hai dhoke se war karna bhi

ab us ke wada-e-farda ka zikr kya karna
mujhe pasand nahin inhisar karna bhi

hamein ne shauq-e-shahadat ki ibtida ki thi
hamin pe khatm hua jaan nisar karna bhi

jo 'rashk' karna hai tum ko to 'rashk' mujh se karo
ki mera kaam hai logon se pyar karna bhi