silsila ye azal se jari hai
zindagi kya hai zakhm-e-kari hai

main jo aaya hun to samajh lo tum
ye mohabbat bhi duniya-dari hai

meri shohrat bhi thi baja lekin
teri jaanib to khalq sari hai

saya aaseb ka hai basti par
raat aur din sabhi pe bhaari hai

justuju mein ho kis ki sargardan
kis liye itni be-qarari hai

fitratan hum bade bahadur hain
iltizaman ye jang haari hai

kis liye chup ho kuchh batao 'sarosh'
kyon zaban bolne se aari hai