sirf baithe hue aahen na bharo
ishrat-e-dil ke liye kuchh to karo

walwalon ko na kahin nind aa jae
sitam-e-ahl-e-sitam se na daro

hai ye qismat ki shikayat be-sud
tum mein jauhar bhi hai kuchh be-hunro

dagh hi dagh nazar aaenge
chand mein bhi tumhein ai kam-nazro

manzil-e-sabr bahut aage hai
sarhad-e-zulm se bedad-garo

apne ghar-bar se rahna hoshyar
mera ghar phunk ke shorida-saro

khun-e-dil apna baha kar 'jarrar'
rang-e-taswir mohabbat mein bharo