sitam-dost fikr-e-adawat kahan tak
kahan tak wafa se baghawat kahan tak

khilaf-e-suluk-e-mohabbat ke khugar
khilaf-e-suluk-e-mohabbat kahan tak

musalsal sitam ki hukumat ke bani
musalsal sitam ki hukumat kahan tak

utho dard ki justuju kar ke dekhen
talash-e-sukun-e-tabiat kahan tak

kabhi hukm-e-pir-e-mughan bhi baja la
faqat ittiba-e-shariat kahan tak

kabhi kuchh natija nikalo to jaanen
faqat khabt-e-malum-o-illat kahan tak