sitam ka hath na roka magar bura to kaha
jo zer-e-lab sabhi kahte the barmala to kaha

tamam-shahr tha munkir tere talluq se
gharib-e-shahr tujhe hum ne aashna to kaha

pighal rahi hai taghaful ki barf ab shayad
ki muskura ke mujhe yar bewafa to kaha

wafa ka qaht hai itna ki ab sar-e-maqtal
main is pe khush hun ki yaron ne marhaba to kaha

hoi na sina-sipar go himayat-e-haq mein
jo misl-e-tegh tha wo harf-e-haq-numa to kaha