siyah safha-e-hasti pe main ubhar na saka
meri shabih mein koi bhi rang bhar na saka

har ek rah thi masdud kohsaron mein
bulandiyon se kisi tarah main utar na saka

bure dinon ka main ek khaufnak manzar hun
mujhe kabhi bhi koi shakhs yaad kar na saka

nukile khar the shishe the sang-reze the
rah-e-hayat se be-dagh main guzar na saka

pukarta raha mujh ko koi magar 'shahid'
main mauj-e-bahr tha pal bhar kahin thahar na saka