soch ki uljhi hui jhadi ki jaanib jo gai
aas ki rangin titli khun ka chhinta ho gai

us ki khushbu thi meri aawaz thi kya chiz thi
jo daricha tod kar nikli faza mein kho gai

aakhir-e-shab dur kohsaron se barfani hawa
shahr mein aai mere kamre mein aa kar so gai

chand chhilkon aur ek budhi bhikaran ke siwa
rail-gadi aakhiri manzil pe khali ho gai

is qadar mela na tha jis par kisi ka nam tha
phir bhi 'aslam' aankh chhalki aur kaghaz dho gai