socha nahin tha jaisa nazara hua badan
yani falak ke nam sitara hua badan

ilm-o-hunar se aap nikhaara hua badan
kitna sanwariyega sanwara hua badan

aaya na koi kaam nakara hua badan
apni wajudiyat ka utara hua badan

bazi-e-zist jaan se haara hua badan
ashab-e-husn ab se tumhaara hua badan

hoga khuda kisi ki hifazat ke waste
mere liye to mera sahaara hua badan

hairat-zada hai aaine ko dekh ru-ba-ru
sau suraton se ek sanwara hua badan

chashm-e-ghazal hont kanwal hae na ji na
mera badan na ho ke ishaara hua badan