sochna aata hai danai mujhe aati nahin
bona aata hai gul-arai mujhe aati nahin

sar uthata hun to ta-hadd-e-nazar pani hai
dubna chahun to gahrai mujhe aati nahin

hansta hun khelta hun chikhta hun rota hun
apne kirdar mein yak-jai mujhe aati nahin

roz-marra mein lapeti hui bosida-faza
apne atraf se ubkai mujhe aati nahin

raunaqon mein bhi alag ho ke raha hun aksar
band kamre mein bhi tanhai mujhe aati nahin

lashkar aaya tha magar qafile ki surat hun
kisi bhi shakl mein paspai mujhe aati nahin