socho to bahut kuchh hai magar baat zara si
yaad aati hai ab tak wo mulaqat zara si

ai kash ki pakizgi-e-husn ko milti
waraftagi-e-shorish-e-jazbaat zara si

ek umr teri yaad mein kis tarah guzaren
wo jin se guzarti nahin ek raat zara si

ab bhi wahi aalam hai wahi hum hain wahi gham
badli hi nahin surat-e-haalat zara si

itna bhi na de tul gham-e-ishq ko 'rahi'
badh jae na zalim kahin ek baat zara si