soe huon mein khwab se bedar kaun hai
is aalam-e-khayal mein hushiyar kaun hai

mat puchh us ka talib-e-didar kaun hai
ye dekh mohr-bar-lab-e-guftar kaun hai

utra hai chand sine mein ya khud hi jal uthe
tarikiyon mein dil ki ziya-bar kaun hai

arz-e-hunar mein koh-e-wafa par ho tesha-zan
de jaan nazr-e-shoala-e-izhaar kaun hai

jo fan-taraaziyan qad-o-gesu ki bhanp le
jo jaanch le qayamat-e-raftar kaun hai

sab apne apne dar-o-rasan sath le chalo
puchhenge wo ki tum mein wafadar kaun hai

kuchh log apne khun mein naha kar chale gae
ab surkh-ru-e-arsa-e-paikar kaun hai

do-gam dil ki rah pe chalna muhaal hai
ab aur aisi wadi-e-pur-khar kaun hai

patthar se aag aag se jo lae ju-e-shir
tum mein wo tesha-dar-e-fusun-kar kaun hai

shayad koi patakta hai sar chal ke dekhiye
'baqar' hai qais hai pas-e-diwar kaun hai