soz-e-darun ko aankh se bahar nikal kar
har shakh rakh rahi hai gul-e-tar nikal kar

lae husain aakhiri lashkar nikal kar
kheme se tishna-lab ali asghar nikal kar

thode hi din hai shakh-e-shajar par ye naghmagi
ud jaenge ye log nae par nikal kar

ahl-e-nazar ke samne rakhta hun dekh len
laya hun musht-e-khak se gauhar nikal kar

yun bhi ho mujh ko chashm-e-fana dhundhti phire
rakh dun main ruh-e-jism se bahar nikal kar

is dastan mein aur to kuchh bhi naya nahin
us ke bichhadte waqt ka manzar nikal kar

karta hun sajda aap main apne jamal ko
patthar se ek khayal ka paikar nikal kar

ab shairi mein aur kisi ko bhi den jagah
majzub-o-mast-o-faqr-o-qalandar nikal kar

shahron ki bud-o-bash ne wahshi kiya use
phirta hai qais hath mein khanjar nikal kar