subh-e-sadiq ka abhi jadu nikhar paya na tha
taeron ne naghma-e-hamd-o-sana gaya na tha

nikhaton ka shokh naghma raqs mein aaya na tha
nuqrai kirnon ne apna jal phailaya na tha

thi mizaj-e-zindagi mein ek tajassus ki thakan
dur tak bhi manzilon ka kuchh nishan paya na tha

dhadkanen hi le rahi thin dhadkanon ka jaeza
qurbaton ne khush-nawa naghma abhi gaya na tha

kuchh guman thi kuchh yaqin thi shorish-e-hasti yahan
ye wo qissa tha jise koi samajh paya na tha

qurbaton mein jhank kar dekha kiye tha barha
duri-e-dil ke siwa kuchh bhi nazar aaya na tha

wo ada-e-dil-nashin jo soch ki jhankar thi
is ada ne dard ka naghma abhi gaya na tha

tere hi faiz-o-karam se malik-e-kaun-o-makan
umr bhar ye dil kisi aalam mein ghabraya na tha

qurbaton ke hadson ne bakhsh di thin raunaqen
aashna na-ashna koi nazar aaya na tha