subuk hoti hawa se tez chalna chahti hun
main ek jalte diye ke sath jalna chahti hun

ghubar-e-be-yaqini ne mujhe roka hua hai
zamin se phut kar bahar nikalna chahti hun

main khud sahmi hui hun aaine ke tutne se
bahut aahista sath-e-dil pe chalna chahti hun

numud-e-subh se pahle ka lamha dekhne ko
andheri raat ke paikar mein dhalna chahti hun

main shahr-e-shab ko aankhon ki dua dene se pahle
dar-o-diwar ka chehra badalna chahti hun

kisi ke khwab ki takmil mein patthar hui thi
ab apne khwab ki lau se pighalna chahti hun