sukhan mein jo rawani ho gai hai
khuda ki mehrbani ho gai hai

jo tere waste likhi gai thi
wahi meri kahani ho gai hai

naya ilzam rakh do aadmi par
ye duniya ab purani ho gai hai

tera mausam jo aaya hai nazar mein
ghazal kitni suhani ho gai hai

teri aankhon mein dhalti muskurahat
hamari zindagani ho gai hai

kahan ka dil kahan ka hai fasana
mohabbat aani-jaani ho gai hai

nahin likhegi 'nilam' nam un ka
wo ab qadre siyani ho gai hai