suna hai pyas ki takmil hone wali hai
ye raat ret mein tabdil hone wali hai

main apni zat mein tahlil hone wala hun
dhuen se jism ki tashkil hone wali hai

faza mein chup ki syahi ghuli hai aaj ki raat
lahu se hukm ki tamil hone wali hai

yahan pe khak udegi tamam raat so ab
is ikhtisar ki tafsil hone wali hai

hain kushtagan-e-sada aakhiri kinare par
ai khamushi teri tarsil hone wali hai