suna suna aangan hai aur baam-o-dar khamosh
kis se guftugu kije ho jo ghar ka ghar khamosh

shama ki tarah koi gham-gusar kya hoga
sath sath chalti hai raat raat bhar khamosh

kuchh to maslahat hogi jo zaban nahin khulti
warna teri mahfil mein hum aur is qadar khamosh

hai sukut ka aalam kaenat par tari
jab se hum idhar chup hain aur wo udhar khamosh

shahr-e-dil pe chhae hain dasht-e-gham ke sannate
kitni aarzuen hain sab ki sab magar khamosh

karwan ko luta hai kis ne ye batae kaun
chashm-e-rahzan hairan dast-e-rahbar khamosh

jaur-ha-e-yaran ke silsile na badh jaen
aur bhi rahe 'khawar' tum yunhi agar khamosh