sunaun dastan tum ko alam ki
nahin hai intiha kuchh mere gham ki

main khud hi hun saza-war-e-zamana
kisi ne meri khatir aankh nam ki

mera mahbub jab mujh ko mila hai
nahin hajat kisi rahm-o-karam ki

hue hain raste hamwar khud hi
koi parwa nahin hai pech-o-kham ki

meri taqdir wabasta tumhin se
yahi tahrir hai lauh-o-qalam ki

hawadis hain hamesha sath mere
nahin hai baat kuchh jaur-o-sitam ki

'nasim' ab ek hi meri khushi hai
tamanna-e-dili bab-e-haram ki