suraj se ras bhanwar se tu sahil kashid kar sahra ke zarre zarre se mahmil kashid kar in raeganiyon se kinara na kar qubul la-hasili ke karb se hasil kashid kar bhar tu sitara-war udanen falak ke par aur la-makan se phir koi manzil kashid kar jazbon ki hiddaton se tu barfab khinch le mina-e-ishq se tu mera dil kashid kar taskhir kar fishaar-e-rag-e-aftab ko qaus-e-quzah se phir had-e-fasil kashid kar imkan se tahayyur o shishe se aks chhin zulmat-e-shab se tu mah-e-kaamil kashid kar gham-ha-e-na-rasai-e-zauq-e-talab samet arzaniyon se shauq ki mushkil kashid kar baada-o-angbin se mere khal-o-khad sanwar mani ke shahkar se ek til kashid kar soz-e-darun tarash kisi barf-zar se yakh-basta ashk mai ke muqabil kashid kar 'anjum' sharar-e-ishq hai hangama-e-alast band-e-hijab se use ghafil kashid kar