surat-e-gham ki umandte hue baadal ka mizaj
ras aae to bhala kyon kisi aanchal ka mizaj

zindagi dhup mein tapte hue sahra ki tarah
har khushi ruth ke jate hue baadal ka mizaj

kaghazi kashtiyan bahte hue pani mein na chhod
kis ko malum ki dariya mein hai daldal ka mizaj

shakh-e-shamshir pe lo zakhm-e-bahaaran mahke
rut badalte hi badal jata hai jangal ka mizaj

ab ke basti mein badi dhum rahegi yaro
chand raushan hai hawa mein bhi hai pagal ka mizaj

us ke lahje ki halawat mein ghule jate hain
us ne paya hai magar dosto hanzal ka mizaj

kis ne dekhe hain badalte hue din-raat 'shamim'
kis ko malum ki ras aae kise kal ka mizaj