tab-e-dil sarf-e-judai ho chuki
yani taqat aazmai ho chuki

chhutta kab hai asir-e-khush-zaban
jite ji apni rihai ho chuki

aage ho masjid ke nikli us ki rah
shaikh se ab parsai ho chuki

darmiyan aisa nahin ab aaina
mere us ke ab safai ho chuki

ek bosa mangte ladne lage
itne hi mein aashnai ho chuki

bich mein hum hi na hon to lutf kya
rahm kar ab bewafai ho chuki

aaj phir tha be-hamiyat 'mir' wan
kal ladai si ladai ho chuki