tadapti bijliyon se tira-samani nahin jati
chaman is tarah ujda hai ki virani nahin jati

zarurat hai kisi musa ki phir aiman ki wadi mein
wo yun aawaz dete hain ki pahchani nahin jati

teri taswir kya dekhi ki khud taswir ban baithe
hamare dida-e-hairan ki hairani nahin jati

nae saghar naya saqi naya andaz-e-mai-khana
qadamat ki yahan ab baat kuchh mani nahin jati

ba-juz takhrib insan ki samajh mein kuchh nahin aata
zamin se is liye takhrib-samani nahin jati

khushamad ki hawa mein phul sab chunne lage 'saqi'
dar-e-gulchin ki tum se khak bhi chhani nahin jati