takmil-e-arzu ki tamanna karenge hum
khud apne jazb-e-shauq ko ruswa karenge hum

dard-e-jigar ka aaj mudawa karenge hum
qismat hamari soegi jaga karenge hum

gum-karda rah-e-dasht-e-junun mein na ho koi
ab apne naqsh-e-pa ko mitaya karenge hum

mana ki rah-e-ishq mein hai naqs-e-abru
kis ne kaha ki tark-e-tamanna karenge hum

aisa bhi koi hoga zamane mein inqalab
jab aankh bhar ke aap ko dekha karenge hum

baada to wo bhi pita hai lekin ba-qaid-e-hosh
'manzar' ko chashm-e-khalq mein ruswa karenge hum