talne se waqt kya talta raha
aastin mein sanp ek palta raha

maut bhi leti rahi apna khiraj
karobar-e-zist bhi chalta raha

koi to sancha kabhi aaega ras
main har ek sanche mein yun dhalta raha

shahar ke sare mahal mahfuz the
tera mera aashiyan jalta raha

zindagi mein aur sab kuchh tha hasin
apna hona hi mujhe khalta raha

bujh gae tahzib-e-nau ke sab charagh
ek mitti ka diya jalta raha

aarzuen khak mein milti rahin
nakhl-e-ulfat phulta phalta raha

ban ke sone ka hiran tera wajud
mere mahsusat ko chhalta raha

raat bhar suni rahi birhan ki sej
aur aangan mein diya jalta raha

zikr-e-haq bhi tha baja 'sahir' magar
mai-kashi ka daur bhi chalta raha