tamam aalam-e-imkan mere guman mein hai
wo tir hun jo abhi waqt ki kaman mein hai

abhi wo subh nahin hai ki mera kashf khule
wo harf-e-sham hun jo ajnabi zaban mein hai

in aanganon mein hain barson se ek se din raat
yahi ruka hua lamha har ek makan mein hai

ye aks-e-ab hai ya is ka daman-e-rangin
ajib tarah ki surkhi si baadban mein hai

jahan dalil ko patthar se todna thahre
wo shahr-e-sang-dilan sakht imtihan mein hai

mujhe adu ki baqa bhi aziz hai 'akbar'
ki ek phul si diwar darmiyan mein hai